搭埃塞俄比亞航空去東京 ＿不是最差＿只是……？

啱啱嘅農曆新年假飛咗轉東京，咁大個女第一次坐Ethiopian Airlines，事前都有小小擔心，不過勝在夠平2000蚊有交易 (其他公司講緊四五千)，仲要係包30kg 行李，一於去馬。講真，坐完之後無我想像中咁差，不過始終係一分錢一分貨，抱住呢個心態去坐會開心好多。

優點：

787飛機夠新淨

唔睇其他嘢睇飛機型號係冇得輸，787飛機夠新淨，而且佢個機艙嘅濕度比其他飛機高，坐完五個幾都唔覺得皮膚好乾，帶住Con 都冇乜唔舒服。

飛機餐用國泰貨 (好似係)

因為我朋友去嗰程搭國泰，番嚟嗰程同我坐埃塞俄比亞，佢話個飛機餐同國泰嘅一模一樣，所以我哋懷疑佢係同國泰買餐或者用同一間公司，味道方面都係嗰啲貨色啦，唔係特別難食嘅，仲有Evian 水飲添。其實我訂機票嘅時候因為驚食唔慣所以網上order咗special meal，不過最後唔知點解冇咗，所以有少少失望。

缺點：

服務唔夠專業

空姐空少態度算係唔錯，起碼都有笑容冇黑面，不過可能training唔夠，唔夠專業。我搭兩程機觀察到派空姐推住部餐車行過係唔會望下有冇乖客嘅手手腳腳會唔小心伸咗嚟，完全係直行直過，我有一次訓著都比佢撞醒咗，所以如果大家下次坐走廊嘅話就要特別小心啦！最搞笑係有位女乘客入咗廁所之後個空姐門都冇敲就開門想入去，嚇到我個心都離一離。

Online Check in 系統唔可靠

基本上要喺埃塞俄比亞航空網頁最底先搵到Check in 

呢樣係我最唔滿意嘅地方，個網站唔夠user friendly，要慢慢搵先搵到做online check in個位，而輸入咗嘅資料又會冇咗，好似頭先講嘅訂餐咁啊，明明訂咗又冇，仲有我明明輸入咗我Ana 個number儲里數，check in 時問地勤又話冇，激死。所以奉勸大家記住check in 嘅時候要double confirm 一次，佢個網上系統係信唔過架！

Delay 風險高

因為呢條航線係由非洲飛黎香港再上客飛去東京，香港只不過係中途站，所以Delay 嘅風險都幾高，之前有個朋友過都有Delay 嘅情況，不過都係遲咗個幾鐘，可以接受嘅。

雖然呢間公司好壞參半，不過如果識得搭嘅話呢間公司嘅性價比好高，嚟緊大家介紹點樣玩法，大家記住留意！