香港航空金/銀卡 升值潛能無限

好多香港人都儲開Asia Miles 甚至馬可孛羅會，不過馬可孛羅會4月轉制，蝦人用咗好多（茄姐張銀卡可能都要報廢）。最近就研究緊金鵬貴賓卡，我可以話俾大家聽呢張卡好有升值潛能，宜家仲搞緊個金鵬貴賓資格挑戰賽，比你快速拎到銀/金卡。

金鵬嘅銀卡同金卡有乜咁巴閉？
如果你有金卡，搭香港航空就可以帶多30 kg 行李，銀卡就可以帶多20kg，此外金銀卡都可以享用香港航空機場貴賓室- 紫荊堂嘆下先上機，好似有自助餐食，茄姐未入過去，唔太sure！

宜家香港航空有多條飛日本航線，例如：沖繩、熊本、宮崎，最近仲開多咗日本岡山呢條線，日本番香港多20kg/30kg 行李真係好爽！仲有，茄姐收到風香港航空嚟緊會加開幾個好受香港人歡迎嘅新航點，所以呢張卡好有升值潛能！ 

就算你唔搭香港航空都好， 搭海南航空、大新華航空、天津航空、祥鵬航空、首都航空、福州航空、阿拉斯加航空航都用得，飛大陸一流！





點玩法？
非常簡單，如果你目前係其他航空公司嘅會員（ANA／英航／日航／國泰乜都得！）或者白金信用卡持有人就可以玩呢個Challenge！申請日期去到2016年12月31日。

1) Scan 你張里數卡
2) Send Email (vip@hnair.com)比海南航空話你要挑戰金卡或者銀卡
3) 得到佢哋Confirm 之後就喺100日之內搭香港航空、海南航空、大新華航空、天津航空、祥鵬航空、首都航空、福州航空、阿拉斯加航空航完成6航段 (銀卡)/ 12航段 (金卡) 就搞掂！

航段即係乜？
呢個有少少複雜，我簡單列個表講下通常嘅計法

經濟艙 單程	1 航段
經濟艙 來回	2 航段
商務 單程	2 航段
商務 來回	4 航段

 
假設你要衝銀卡，搭經濟艙來回台灣3次就得，又或者你可以單程單程咁玩，總之100日內飛6次就得。茄姐就覺得飛近嘅好似抵啲，所以台北、峇里、北京係幾好嘅選擇。

以上講嘅係通常計法，茄姐要話俾大家知航段計法係以艙位代碼嚟分，香港航空Z/I/R/G/O/E呢幾個艙位代碼係唔計嘅，所以大家book 機票嘅時候就要留意，尤其係特平機票，Book 機票之前可以去官網對照番實際得到嘅航段。不過茄姐就有朋友試過寫話冇分，但實際上又會計埋呢個情況，搏唔搏你哋自己諗！

即時優惠
茄姐今日就搵到張香港航空來回峇里HK$1268嘅超荀機票，即賺 2 航段，諗諗下要衝張銀卡其實都唔係啫！

不過只限聽日（8/3）出發





貼士：
1) 因為要100日內完成，所以大家最好計劃好啲行程先好申請開通個Challenge
2) 香港航空某啲航點嘅Business Class 幾抵搭，又可以賺雙倍航段，計落其實都抵
3) 如果你現時有任何 航空公司嘅會員卡，你都可以試下先申請一張，例如ANA 網上伸請幾分鐘搞掂，然後再apply 佢個challenge，茄姐去客服問過，佢冇話咁做唔得，所以大家試下先
4) Send email 去金鵬會申請玩個Challenge 要注意以下格式，詳情睇呢度

金鵬卡號	姓名	現等级	其他航空公司/航空聯盟名稱	等级	挑戰金鵬貴賓級別	申请日期
7000000000	陳xx	普通卡	國泰航空公司馬可孛羅會	銀卡	金卡	3月7日