香港做奴隸 峇里做皇帝

峇里雖然唔可以稱得上渡假天堂(茄姐要求高)，但以平價錢高質享受呢點黎講，峇厘比泰國更勝一籌，而且活動算多元化，大人小朋友都啱玩，下次想去旅行relax下，諗下佢，喺香港享受唔到嘅，去峇里享受啦！

先大概介紹下峇里有乜好有乜唔好，比大家有個印象先再慢慢睇落去。峇里最吸引茄姐嘅地方必定係resort，平、中、高價位resort林立，無論你budget 幾多，總會搵到一間啱你嘅，要記住好多就算價錢唔貴質素都可以好高。其次就係消費，食野，交通，揼骨甚至係包車玩都好平，仲要平過泰國添。第三樣就係水上樂園，沙灘好多地方都有，但水上樂園就唔係度度搵到，所以峇里真係唔錯。成日有人會擔心印尼機場係咪好黑暗，係咪要比錢關員先入得境，茄姐去過峇里兩次都冇遇過咁嘅問題，始終遊客區唔會太差。

講咗好就要講下有乜唔好，如果以shopping 嚟講，峇里的確比下去，對比泰國佢冇乜本土品牌可言，但都搵到正野買嘅，只係比較少囉。仲有係啲popular嘅地方海灘唔算好好好清，如果想要清嘅話就要去遠啲比較冷門嘅小島。