茄姐新發現：600蚊上北京

【開心Share】茄醬，唔係，茄姐先啱，最新發現六舊水已經夠香港來回北京再玩埋石家莊，比起平時要千幾蚊飛北京平一半，都算唔錯嘅，嗱當然唔係10級抵，尤其當你知道六舊幾已經去到蘇梅嘅時候，不過茄姐就覺得如果大家想去北京玩，不妨考慮下茄姐嘅玩法。

事關茄姐最近就Plan 緊去石家莊探朋友順便去北京玩幾日，一check 機票發現原來春秋航空香港來回石家莊都只不過係HKD399，嘩，仲平過深圳飛，6月30日之前都有。石家莊同北京其實好近，搭高鐵去都係1.5小時(130RMB一程)不過茄姐對高鐵有偏見，所以諗住搭3個鐘火車(RMB50幾蚊)去算啦，所以計埋去晒石家莊同北京都最平都六舊水有找。茄姐問過石家莊個朋友，佢話差唔多個個鐘都有車去北京，如果唔係節假日去到站買票都得。石家莊雖然唔算多嘢玩，但附近有個古城可以參觀下，都可以玩番一兩日先去北京……

嗱茄姐冇乜點做過功課去check 有冇其他方法去北京係最抵，因為茄姐一心都係去石家莊探朋友，點知見到咁平，開心share 下俾大家知道，有其他更抵嘅歡迎話俾我知。

P.S. 最近有網友幫茄姐改咗個新花名做茄醬，其實茄姐好鬼鐘意呢個名，霸氣得嚟又帶點可愛，哈哈。