【倫敦購物攻略】Oxford Street 百貨公司邊間最好行？

倫敦簡直係茄姐Shopping 嘅最愛，最近英鎊又跌，倫敦shopping 本身已經平香港好多咖啦，而加再平啲，就算你唔係太中意Shopping 都好大機會失守！

大家去旅行通常都將行程排到密密麻麻，想勁Shopping 又唔想花太多時間慢慢行，咁一定要識選擇一啲集中晒所有品牌嘅地方，而倫敦購物三大集中地分別係Oxford Street、Covent Garden 同埋位於Oxford 嘅Outlet Bichester Village。

今日先講倫敦嘅Oxford Street，無論你行程幾忙都好，呢條街一定要行！茄姐行Oxford Street心得係主攻百貨公司、Primark同一啲英國先有嘅品牌，其餘嘅有時間再睇。

好似H &M、Topshop 呢啲大路牌子，茄姐建議你唔洗花太多時間喺呢度，價錢同香港大同小異。而Topshop 嘅款確實比香港多，但價錢唔係想像中咁平，除非你係超級Fans，否則快行算啦。

喺Oxford Street 有三大百貨公司，Selfriges、John Lewis 同 Marks & Spencer

，茄姐強烈建議大家一定要行John Lewis 同Marks & Spencer，因為好大機會搵到荀野！

高檔之選 Selfridges 
Selfridges 係較高檔次嘅百貨公司，係各大品牌專櫃集中地，不過價錢相對較貴，而且Discount 大多比其餘兩間百貨少，茄姐通常嚟呢度都係格價同睇款，所以最好安排第一間睇。

尋寶地John Lewis
對比selfridges呢度嘅裝修平實啲，遊客亦都少啲，但亦都有好多名牌野。有時間嘅一定要逐層行 (除咗樓下護皮膚品專櫃果層)，因為好多時喺每層角落位搵到清貨名牌產品！

上次茄姐就喺頂層搵到清貨嘅Rimowa Limbo 大Gip，原價600磅減到299仲有得退稅，呢個價錢就算去德國都冇可能買到！(香港賣緊7千樓上)

喺另一層茄姐又搵到LC煲大減價，同Outlet 同價！所以行John Lewis 就好似尋寶咁，真係要慢慢睇咖。

護膚品之最Marks & Spencer
如果你要買貴價護膚品、香水就一定要行。頭先茄姐叫大家唔洗行John Lewis 地下護膚品專櫃嘅，原因係馬莎買有機會平一大截，因為馬莎好多時都特別Package計落比專櫃買係划算。

好似茄姐咁喺馬莎買一Pack三枝Philip Kinsley 75ml 焗油都係29.5磅，比專櫃買平好多！Nuxe Hair Oil 加防曬又係好抵，所以大家去專櫃格定價，再嚟馬莎入手。

英國百貨公司shopping 小貼士：

1)      百貨公司通常8點就關門，所以最好行咗先。

2)      茄姐個人認為英國鋪頭價錢比較混亂，好似茄姐個Rimowa 咁，擺咗喺Clearance度但價錢又冇改，好彩有問店員先冇錯過呢個荀貨﹐所以大家有咩唔清楚記住要問！

3)      英國買野唔會好似日本/美國咁主動話比你知有咩Coupon/旅客優惠，所以Shopping 前最好去Information 度問下有冇遊客Discount。

4)      百貨公司買嘢大多都可以退貨，所以就算你買錯咗都唔怕，不過茄姐建議盡量唔好煩，唔同美國，呢度退貨店員嘅面色麻麻。

5)      英國退稅每一次要收手續費，所以同一公司買野就要夾埋幾張單先一次過退，咁就收一次手續費。若果你真係退咗之後再買嘢都唔怕嘅，可以拎番張收據叫佢夾番落之前嘅退稅單上。


下次茄姐會介紹Oxford  Street 嘅Primark，應該幾時行，買咩最抵,一次過分享比大家知，記住留意啦！