【英國快餐店攻略】

去到英國你就會發現好多未見過嘅快餐店，格局似Pret A Manger，賣三文治又有，賣壽司湯麵嘅又有﹐價錢£5-6 一個飯，比完錢又有位比你坐低食，絶對係窮遊醫肚嘅好地方。

今次茄姐介紹幾間經常會喺街見到嘅快餐店比大家，邊樣野好食邊樣中伏一次過話比大家知。


[好味飽肚之選] ITSU

ITSU 係一間主要賣壽司／亞洲美食嘅連銷快餐，好似大x樂咁梗有一間喺左近。

佢嘅壽司其實麻麻地，可免則免，反而熱食麵／飯就做得唔錯，味道貼近亞洲人，至少我覺得好食過大x樂。


好似呢個泰式雞飯，糙米混入唔少蔬菜煮成，健康又好食，雞肉比想像中滑，份量幾多食完飽晒，£6幾喺英國算係咁。

另一個係泰式粉絲，味道都惹，可惜份曬比較少，兩三啖食完，要飽肚嘅都係食飯算啦，同樣係£6幾。

［熱湯之選］EAT

呢間鋪頭主要賣三文治，類似Pret A Manger。三文治平均£3,4一份，普普通通唔算好好食，Pret A Manger 好食啲。

茄姐嚟呢間主要都係飲佢碗雞批湯，冇乜味精又Creamy，絶對唔係金寶湯貨色，香港咁嘅價錢難飲到，茄姐差唔多日日飲番碗先安樂。

細碗£5幾大碗£6幾，大碗比較化算，如果兩個人嘅話嗌碗大share 都夠晒。喺英國凍冰冰飲番碗湯暖下個胃真係好舒服。


[思日之選]Yo!  Sushi

如果你好似茄姐咁去襯旅行都突然好想食下Sushi，呢間平價連鎖壽司店就啱晒你。

壽司由£2幾起，整體味道ok 啦，好過爭鮮嘅，不過唔好Expect 太多。

壽司加三文魚刺生只係£5，算抵食，不過三文魚唔夠生鮮。

海鮮烏冬都係£5，夠足料但味道就麻麻，份量都唔太大，用泥填肚都OK 嘅。

[中伏之選] Wasabi

呢間又係同Itsu一樣以售賣壽司為主，亦有熱嘅日式飯麵。

除非方圓十里冇野食，否則都唔洗試。無論壽司同熱食都係差，差唔多嘅價錢你不如去ITSU 食好過。

先講下壽司，£6幾，比爭鮮難食幾倍，三文魚又薄又冇鮮味，唉。

至於個天婦羅炒麵又乾味道又奇怪，唔日唔西咁，雖然£5幾但我都覺肉赤。


想睇其他英國攻略？

【英國購物攻略】Primark 邊樣嘢最抵買？
http://tomatoexp.blogspot.com/2016/10/primark.html
【英國購物攻略】倫敦Oxford Street 邊間百貨公司最好行？
http://tomatoexp.blogspot.com/2016/10/oxford-street.html
英國【歐洲機票攻略】：http://tomatoexp.blogspot.com/2016/04/2016.html