最近翻睇舊相，搵番唔少茄姐當年仲係妹妹仔時去旅行嘅相，真係靚到爆(我指啲景色)，一時感觸想同大家分享下。茄姐細個冇機會去旅行，所以由細到大都好恨搭飛機，試過暑假見到同學仔有得搭飛機自己躲喺個被鬥到喊咗成晚，到咗讀大學時自己係咁補習賺錢，立志每年暑假都要飛兩次，哈又真係做到喎。
今次講嘅係Year 1我跟學校去嘅青海之旅，呢個可以話係我愛上旅遊嘅啟蒙之旅，我第一次感受到原來世界係咁靚咁大，更難能可貴就係因為咁我哋同當地嘅導遊(一個五六十歲叔叔)成為好朋友，今年佢仲專登嚟咗港同我哋相聚添......旅行就係咁奇妙，除咗拉近咗你同世界嘅距離，亦都拉近咗人與人之間嘅距離，平時好少會同到唔係自己年齡階層嘅人做朋友，但旅途上就好似完全冇咗generation gap 咁。
青海係一個內地二、三線城市，所以唔算好繁華，我哋喺西安轉機先去到青海。因為係跟學校去嘅關係，教授安排當地嘅學校接待我哋，事前我哋幾個要求體驗當地人嘅生活，所以一落機當地學校就帶我哋去當地人會住嘅旅館留宿─「XX招待所」。我哋坐車去到招待所已經係十點幾，我喺車上依稀記得招待所四周好黑，得招待所係有燈光，一落車嘅時候離遠五十米已經聞到一陣永遠都唔會忘記嘅廁所臭味，我當時諗唔係掛，佢唔會真係帶我哋上去呢度住掛，我哋都係講下咋喎，唔洗咁認真嘅。諗都未諗完當地學學校代表好熱情咁幫我地拎行李落車，仲幫我哋搬埋入呢間招待所添......
招待所嘅姐姐帶我地去咗一間房，門口寫住「美容連鎖」四個字，姐姐叮囑我哋要鎖好門訓覺就走咗啦。有個同學仔個門出面仲掛住個舊式salon嗰度轉轉轉裝飾，我估呢以前係一個小商場，執咗之後「改造」成招待所。入到房，房燈係著到嘅，有床、有被仲有梳發，睇落都諗住ok 啊，點知行到張床發現唔對路，有血漬又有其他漬，一睇就知應該好耐冇洗過，真係嚇死人，聞一聞臭嘅，我同我個同房即刻諗住自己比錢搬出去，但接待我哋嘅人都走晒，夜夜媽媽點走喎？之後我哋召集埋幾個女同學一齊去公眾浴室沖涼，熱水我哋唔敢奢求，只求快快脆脆沖幾沖算，點知入到去發現個沖涼 (around 500尺)得一盞燈泡，好暗好暗，隱約feel到地下係痴 ，沖涼房仲係冇門嘅，有兩個阿 喺度沖緊涼，佢地好友善咁問我地要唔要面盆(上面好多老泥)，佢哋就黎用完，可以拎盆落樓下拎熱水......最後我哋冇拎熱水(盆太污糟)，我同幾位同學嗱嗱聲用水喉整濕條毛巾抺下個身就算，然係乖乖就訓喺「香噴噴」嘅床一覺訓到天光......
之後我哋間當地人，佢哋話「招待所」喺內地嚟講係最平嘅住宿地方，平均一個人係三十蚊，又學到嘢啦。雖然呢個經歷都算幾恐怖，但宜家大個咗諗番起覺得係一個好寶貴嘅經驗，亦明白到幸福唔係必然，有機會我都希望可以再去呢個招待所睇下，搵番那些年嘅青春！ (待續)
0 意見:
張貼留言