訓完招待所一晚後，第二日教授問我哋訓得好唔好，佢見到我哋面有難色知道唔對路，上完去視察環境之後即同我哋換地方。我哋拉住行李搬入一間2至3星賓館，我哋入去嘅時候冇著燈，佢見有客到先即著燈，不過對我哋黎講呢度已經係天堂啦，嗰一刻真係覺得自己去咗半島酒店咁爽。
安頓完之後我哋就正式踏上青海大地，我哋第一站係去一間西藏族學校參觀，原本以為青海嘅公路好落後，但原來唔係嘅，就算係上山嘅路都又平又新淨，唔講嘅話以為自己去咗外國。仲有沿途風景真係好靚，有時見到一大片沙漠，但有時又會見到油菜花田，有時仲會見到牦牛同綿羊，好可愛。不過如果你沿途人有三急就大件事，因為就算有公廁都係好簡陋，茄姐去池塘上一間草屋仔解決，中間有兩塊木塊俾你蹲喺度，一路大大一路望住喺魚仔喺下面搶食，好搞笑。
經過兩個鐘車程，終於嚟到學校，一入校門即感受到濃厚嘅西藏氣息，學校到處都有分別用藏文同 語寫成的標語、通告，操場雖然簡陋係幾空曠，夠一大班學生玩 (香港連玩嘅機會都冇)，教學大樓望落幾靚，不過裏面就好簡陋，宿舍入面係一排排嘅碌架床，連枱都冇張，究竟係經費不足定……？一路參觀，我哋幾個女仔都一路細聲尖叫，因為呢班少數民放嘅小學生真係好靚仔好可愛，有啲仲係藍眼睛，十足混血兒一樣，然後就FF佢哋大個會唔會做明星。雖然我哋都知道此行目的唔係睇靚仔而係黎考察，但無法子啦我哋嘅感性已經超越理性，尤其係我，哈哈。自此之後我哋更發現青海周街都係靚仔，次見到賣牛肉餅個哥哥好靚仔，忍唔住同佢合照。當地人話俾我哋知原來靚仔藏語叫「扎西」，其實果時真係有啲衝動搵個扎西做男友，可惜當地都美女如雲，輸了！明明今次想講青海湖，講講下又變成講靚仔真係呢，女人就係咁善變，下次一定會分享青海湖，記住留意啦！ (待續)
特別鳴謝：同行者VA Chen 提供靚相 (茄姐好多相都唔見咗)
0 意見:
張貼留言