登登登登，佢就係位於台北101旁邊嘅Grand Hyatt 凱菲屋！呢度嘅Buffet 座落酒店地下，所以冇乜景睇，但聽聞早排裝修過所以都新淨。雖然冇W咁豪咁新潮，但呢度比較有Family feel，裝修以實用性為主。唔知係咪因為暑假關係，大部份都係一家大細黎食，如果係想情侶撐枱腳，茄姐就覺得去W比較好！
餐廳分咗4個嘢食區，分為冷盤、熱食、甜品同飲品區，座落喺餐廳唔同角落，當中以熱食區最大，差唔多佔咗四份一個餐廳，可想而知嘢食有幾豐富。
飲品區
飲品方面，呢度汽水、咖啡同果汁都係任飲。呢度同W一樣都有鮮榨果汁飲﹐一枝枝榨好放喺度比你自己拎，茄姐幾鐘意佢有埋Cocktail 飲，雖然得一款，亦唔算勁好飲，但誠意搭夠！
冷盤區
熱食區
呢度有過十位廚師恭候大家， 嘢食真係多到花都眼埋，樣樣試少少都已經飽晒。如果你本身鍾意食東南亞菜式呢度就啱晒你，呢度嘅熱食以東南亞菜為主，咖哩、沙嗲一應區全，連蒸魚都係用東南亞做法，可能唔岩我口味，我覺得麻麻地，係個星加坡炒面過得去。
另有中菜例如小籠包同蝦餃、燒味、魚片粥等，試咗小籠包，餡料做得幾好但係個皮太厚，估唔到本土菜都做得麻麻.......燒味都係一般啦，其餘太飽冇試！
至於西式反而有驚喜，本來太飽都冇諗住食燒牛肉，但隔離枱個小朋友係咁叫我要食，一試真係好好食，其他熱食都引唔起我食慾，但呢個燒牛肉真係不得了，食完即刻有番胃口，最後隊咗三件先收工。煙三文魚同黑松露意大利飯都唔錯！
另外有各款芝士同面包，茄姐一向麻麻地芝士所以冇食，但望落唔錯！
甜品區
甜品種類幾多，除咗十幾款蛋糕外，仲有緑茶朱古力噴泉，同Häagen-Dazs雪糕。試咗幾款甜品﹐味道一般啦，唔係話難食但總係覺得做得唔夠細緻，
呢方面台北W略勝一籌。
總括嚟講，台北Grand Hyatt 勝在嘢食種類夠多，我覺得比較啱一
家大細嚟食，因為可以照顧老嫩嘅需要。但如果你係想追求食物
嘅精緻同味道，呢度就未必啱你啦。不過以加埋一都係港
幣400蚊嚟講，都算過得去啦！
餐廳資料
台北Grand Hyatt 凱菲屋
價錢：晚餐約HKD400一位
0 意見:
張貼留言