搭埃塞俄比亞航空去東京有策略 三招教你賺到盡

上次就介紹咗呢空公司飛日本東京有乜好有乜唔好，睇落除咗得30KG 行李之外好似冇乜特別，不過我可以話你知

識搭嘅話真係好抵！

不過有樣嘢茄姐想提大家﹐尋日埃塞個官網update 咗，行李資料嗰度寫住經濟客位帶一件23 kg,，商務一件32 kg，同我上次搭唔同咗。不過茄姐打去agent 問過，仲係經濟30 kg，商務40 Kg，所以有得搭好快搭啦！ 

貼士1 節假高峰期搭

埃塞俄比亞航空（埃塞）平日香港飛東京大約2000 蚊，未必夠廉航平，但喺節假日時候埃航有機會做只係加少少，大約HK$2200左右，咁就同廉航差唔多，相對嚟講就會抵咗。以今年暑假高峰期為例，某啲日子來回都係$2200- 2300左右，一家大細唔使逼廉航之餘，又要係晚機返香港，仲要包埋30KG 行李，抵玩啦！

貼士2 廉航去埃塞返最慳

想慳到盡就去東京嗰程買廉航，返嗰程就搭埃塞，慳番行李費之餘又可以夜晚先飛，番到香港都係零晨，第二日又可以繼續番工。以今年清明節假期為例，廉航4月4日早機番做緊2300蚊，埃塞4月3日晚機返都只不過係HK$2600 左右 (37060 Yen) (大家自己去Check 下仲有冇啦)，重點係包埋30KG 行李，所以識搭一定係回程搭埃塞。

貼士3 Check-in 時加錢upgrade 坐Business 慳行李費

每次去東京都會買到超重，雖然埃塞已經包30kg 行李，但對好多女人又或者水貨客嚟講都係唔夠。而坐埃塞Check –in 時候upgrade 坐商務只需要加17000 Yen，大概1200蚊港幣就可以啦，比你帶多10kg 行李，又有得享受787 個商務機艙，計落係抵嘅。不過咁坐就唔包保一定有得upgrade，要有位先可以，所以唔建議大家節假高峰期時冒險。

一句講晒埃航算係一分錢一分貨，尤其喺節假高峰期去東一票難求嘅時候，埃航嘅性價比就最高，係一個唔錯嘅選擇，如果你問我坐唔坐廉航定埃塞俄比亞，我茄姐一定揀後者，起碼肚餓有嘢食口乾有水飲，最重要係包埋30 kg 行李。

以下係埃塞俄比亞航空香港飛東京嘅資料，大家可參考下：

飛機型號	波音787
香港去東京 航班時間	逢星期三、五、日13:45 出發
東京去香港 航班時間	逢星期三、五、日 19:45/ 21:00 出發 (視乎日子)
價錢	平日：約HK$2000 來回連稅 節假日：最平HK$ 2200 來回連稅 (最好提早預訂先有咁抵)
逗留日子	不限
行李	經濟艙 30 kg  商務艙 40 kg (訂之前再Check下)