Holiday Inn 集團推優惠益窮人 下集

收到有朋友話好想睇埋下集真係好開心，多謝大家支持，希望呢篇文幫到大家啦！但我要利伸先，以下只係我個人心得，未必100%準確，因為我宜家都仲玩緊未拎晒50500分，如果有錯漏歡迎各方猛人提出一齊討論，茄姐最想係想見到大家都拎到啲分一齊嘆世界！

講番正題啦，先同大家講呢個活動有咩陷阱先，嗱最容易嘅中伏位就集中喺任務二、三、四，如果你分開黎睇就好易lai 嘢，因為佢呢三個任務其實都有關連，茄姐貼番佢個玩法出嚟同大家逐點分析

陷阱1: 三晚要包2個stay

先睇任務三，佢話要住3晚酒店，再睇任務二，佢話要喺官網訂2次(2個stay )，咁即係話你呢三晚酒店要分兩次訂，仲要係唔可以連續三晚同一間酒店，就算你分兩次訂中間check out 再入住都唔得，佢都係當你一個stay。不過如果你住兩晚之後去其他酒店住一晚，再換另一間酒店，之後再番去同一間酒店住咁就得; 又或者住兩晚Hoilday Inn 集團A酒店，第三晚去Holiday Inn 集團B 酒店咁都得！

陷阱2: 其中一個Stay 一定要係周未嘅兩晚

如果你三晚分開晒住都係唔得，因為任務四講明其中一個stay 嘅一定要有一晚係星期六兼且要連住星期五或星期日，一係就星期五+星期六，一係就星期六+星期日。

解釋完仲唔明唔緊要，睇表，我列咗個 combination 做例子比大家睇，咁可能會易明啲。我當你宜家要去一個trip 係玩四日嘅，你可以咁做：

Holiday Inn A酒店 係膽 (必定要Week End 兩日)

Holiday Inn B酒店 係拖 (你唔拖佢都得，你可以三日都住Holiday InnA)

	星期四	星期五	星期六	星期日
兩間 Holiday Inn 做法		Holiday Inn A	Holiday Inn A	Holiday Inn B
同一間 Holiday Inn  做法	Holiday Inn A		Holiday Inn A	Holiday Inn A

如果你係分開兩次trip 玩仲好，一次去住兩晚weekend，另一次再住多晚就搞掂！

好啦，以上可能適合Plan 咗4月30日前出trip 嘅朋友，如果你冇旅行去又想賺分，咁可以去澳門、深圳呢啲近近哋嘅地方搞掂佢，當係去同女友慶生又好同阿媽去行下又好，洗少少錢住三晚拎50500分真係好抵。以下有啲價錢比大家參考下！

3月26日-27 日 復活節期(星期六check in, 星期日check out )

深圳羅湖Holiday Inn Express	RMB 342起(同平時周未一樣)
深圳龍崗	RMB 463起 (同平時周未一樣)
香港九龍東 Hoilday Day Inn Express	HK$684起  (平時周未HK$ 646起)
澳門 Holiday Inn	HK$1140起 (平過平時HK$1216起)
珠海 Holiday Inn	HK$687起 (如果去澳門就不如住喺珠海，價錢同平時冇變)

不過有啲特別價錢嘅房，經其他旅行agent 訂嘅房等等都唔計落呢個活動度，所以訂之前大家望下啲條款。仲有訂房時會另加服務，茄姐經驗係加咗17%左右，不過計落都平嘅......

睇啱就即click 呢度訂房啦！