Holiday Inn 集團推優惠益窮人 上

一向慳家嘅茄姐其實好少住啲貴酒店 (你信唔信？哈哈)，正因為咁茄姐先可以玩到Holiday Inn 集團IHG Rewards Club (優悅會)個2016 Accelerate 活動，準備刀仔鋸大樹鋤佢50500 分換取酒店房或者房間upgrade等 之用。準備去旅行嘅朋友，反正都要Book 酒店架啦，咁不如就book Holiday Inn玩呢個活動賺積分，第日分分鐘夠你住多十晚，玩到4月30日咋。

點解我話呢個係窮人恩物，因為得新member 或者年資淺嘅member 先有咁著數 （更新：有朋友話新member 都未必有咁嘅offer,可能個個唔同，要再check)，茄姐個富貴Friend 大衛哥已經係資深會員，得到嘅代遇完全唔同，難玩好多，有圖有真相，你哋自己睇啦！

資深會員嘅Offer 係咁嘅

50500分換到咩？點樣用呢啲積分其實都係一門學問，以換房為例: 積分適用於某啲IHG集團酒店(東南亞好多都有)，茄姐check 過曼谷Crowne Plaza 一晚用25000分就換到，價值港幣1000蚊左右，5萬分啱啱夠換2晚。想用得盡啲嘅話就要等point sale，以前試過有酒店做緊5000 分一晚，換言之50500分夠你換到10晚房，抵到呢...
IHG 2016 Accelerate適用於乜酒店？Holiday Inn.，Holiday Inn Express，InterContinental (洲際)，Crown Plaza (皇冠假日)，Hotel Indigo，Staybridge suites，Candlewood suites，EVENTM, HUALUXETM (華邑)  都適用架。咁代表乜，咁即係你喺上述酒店搵間最平嚟住嘅都已經可以賺到積分，將來就用啲分嚟住貴嘢，係咪好抵先！ 仲有以上唔少酒店香港，澳門，大陸都有，就算平平地番羅湖住Holiday Inn Express 都一樣得，所以茄姐先咁推薦你地玩呢個活動。 點玩法？喺2016年4月30日前完成以下四項任務，就可以得到50500分，就算完成唔晒全部任務，都可以攞到已完成咗嗰部份任務嘅分數。
報名&官方詳情 https://www.ihg.com/content/us/en/offers/q1accelerate16/registration

任務一	Download IHG 個app Download 個app 登入埋就可以得到500分，easy 汁。
任務二	透過IHG 官網訂酒店 去官網或者喺個app 度Login 入去訂酒店，訂夠兩次酒店就可以拎到2000分。
任務三	住三晚酒店 喺4月30日前去是但一間或者兩間IHG reward club 住3晚，就有2000分
任務四	週末入住 你其中一個stay 嘅一晚一定要卡住星期六晚，例如：星期五+ 星期六或者係星期六+星期日，咁就可以拎多2000分。
額外獎賞	只要完成咗以上四個任務中嘅三項，就可以另外獲得10000分。
終極獎賞	完成晒全部四項任務，就再可獲得34000分。
	總共可得分數：50500 分

睇落好似簡單，但實際上個玩法幾複雜，一唔小心玩錯咗就會拎唔齊啲分咁就會好蝕！所以下一篇茄姐會同大家詳細再分析點玩，list out 啲陷阱出黎比大家參考，仲會教你點用最平方法儲齊50500分，記得留意！喺等我嘅期間，你哋Download 定個App get ready先，哈哈！